Ն.Ս.Օ.Տ.Տ. ԳԱՐԵԳԻՆ Բ ԱՄԵՆԱՅՆ ՀԱՅՈՑ ԿԱԹՈՂԻԿՈՍԻ ՀԱՅՐԱՊԵՏԱԿԱՆ ՅՈՐԴՈՐԸ ԿՈՐՈՆԱՒԻՐՈՒՍԻ ՀԱՄԱՒԱՐԱԿԻ ԱՌՆՉՈՒԹԵԱՄԲ

Սիրելի բարեպաշտ ժողովուրդ,

Մտահոգութեամբ եւ աղօթքով ենք հետեւում կորոնաւիրուսի համաւարակի շուրջ աշխարհում տեղ գտնող զարգացումներին: Այս դժուարին ժամանակներում, երբ մարդկութիւնը փոթորկուած է համաւարակի վտանգով, որից անմասն չէ Հայաստան աշխարհը, եւ խռովայոյզ է նաեւ մեր կեանքը, հայրաբար յորդորում ենք մեր հոգեւոր հայրերին եւ հաւատացեալ ժողովրդին՝ առաւելագոյն զգուշութիւն ցուցաբերել եւ խուսափել հանրային շփումներից եւ կուտակումներից։ 

Կոչ ենք ուղղում բոլորին՝ գործել անձնական եւ հանրային բարձր գիտակցութեամբ եւ պատասխանատուութեամբ ոչ միայն մեր անձերի, այլեւ միմեանց հանդէպ հոգածութեամբ՝ խորապէս ըմբռնելով, որ այս պահին իւրաքանչիւրի կեանքի անվտանգութիւնը նաեւ մեր անձնական պատասխանատուութիւնն է: Առ Աստուած ապաւինութեամբ աղօթում ենք վարակուածների եւ մեկուսացուածների ապաքինման եւ հոգեւոր ամրութեան համար։ Մեր բարձր գնահատանքն ու օրհնութիւնն ենք բերում զօրուգիշեր իրենց անսակարկ ծառայութիւնը մատուցող մեր բժիշկներին, ովքեր առաւելագոյն ջանքեր են ներդնում իրենց ծառայութեան մէջ՝ գործելով արտակարգ իրադրութեան պայմաններում: 

Առկայ կացութեան շուրջ խորհրդակցելով մեր Եկեղեցու Նուիրապետական Աթոռների գահակալների հետ եւ ստեղծուած իրավիճակը այսօր քննարկելով հայաստանեան եպիսկոպոսների հետ՝ որոշեցինք․ 

Ա․ մինչեւ Աւագ Հինգշաբթի ընկած ժամանակահատուածի համար Եկեղեցիների ծառայութեան ժամեր սահմանել իւրաքանչիւր օր ժամը 9։00-ից մինչեւ 19։00-ը՝ հաւատացեալների անհատական այցելութիւնների ու առանձնական աղօթքների, ինչպէս եւ Սուրբ Հաղորդութեան եւ հոգեւոր միւս կենսական պահանջմունքների բաւարարման համար, 

Բ. Սուրբ Պատարագի արարողութիւնները անցկացնել դռնփակ, առանց հաւատաւոր ժողովրդի մասնակցութեան՝ ըստ կարելիութեան տեղերում կազմակերպելով պատարագների հեռասփռումը, 

Գ. Ծաղկազարդի տօնին չեղարկել մանուկների օրհնութեան կարգը, Անդաստանի արարողութիւնը եւ ճիւղերի օրհնութիւնը կատարել առանց հաւատացեալների ներկայութեան, 

Դ․ Սուրբ Աստուածածնի Աւետման տօնին՝ ապրիլի 7-ին, չկատարել մայրութեան բերկրանքին սպասող կանանց օրհնութեան կարգը,

Ե․ չկատարել Ս․ Պսակի արարողութիւններ, 

Զ․ Ս․ Մկրտութեան խորհուրդը կատարել խիստ անհրաժեշտութեան դէպքում (մկրտուողի հիւանդութեան պարագայում),

Է․ յուղարկաւորութիւնների պարագային կատարել միայն Գերեզմանի կարգը՝ յորդորելով սգացեալներին ձեռնպահ մնալ յուղարկաւորութեան եւ հոգեհացի մարդաշատ հաւաքների կազմակերպումից։ 

Սոյն որոշումները հրահանգելով եկեղեցական կառոյցներին ի գործադրութիւն՝ առաջիկայ չորեքշաբթին՝ մարտի 18-ը, յայտարարում ենք համազգային աղօթքի օր՝ հրաւիրելով իւրաքանչիւրին ժամը 19:00-ին իր գտնուելու վայրում իր առանձնական աղօթքով միանալու հոգեւոր դասին՝  հայցելով, որ Տիրոջ օգնականութեամբ աշխարհը եւ մեր ժողովուրդը ի զօրու լինեն միաբանութեամբ, փոխադարձ զօրակցութեան ոգով յաղթահարելու այս փորձութիւնը։ 

Այս դժուարին պահին հարկ է, սիրելիներ, միասնական կերպով համախմբուել եւ ամենայն աջակցութիւն ցուցաբերել ՀՀ կառավարութեանն ու պատկան մարմիններին, խստօրէն հետեւել թելադրուող բոլոր հրահանգներին եւ իշխանութիւնների կողմից սահմանուած պահանջներին։ 

Մենք միասին՝ հանրային համերաշխութեամբ, քաղաքացիական եւ հոգեւոր բարձր պատասխանատուութեամբ ու գիտակցութեամբ եւ մեր Տիրոջ շնորհով ու ողորմածութեամբ կը յաղթահարենք նաեւ այս դժուարութիւնը: Կեանքը աստուածային պարգեւ է եւ ամենաթանկը, որին պէտք է հոգ տանենք միմեանց հանդէպ սիրով։ Հիմա՛ է ժամանակը վկայելու մեր սիրոյ եւ միասնութեան մասին:

Տիրոջ օրհնութիւնը, շնորհն ու ողորմութիւնը թող լինեն մեզ հետ եւ ամէնքի․ ամէն։

Մարտի 16, 2020 թ.