ԿՈՄԻՏԱՍԻ ՆՈՒԻՐՈՒԱԾ ՊԱՆԾԱԼԻ Հ ԱՄԵՐԳ՝ ԹՈՐՈՆԹՈՅԻ ՄԷՋ

Յարութիւն Դերձակեան 

      Հայ ժողովուրդի հանճարեղ զաւակներէն, հայ ազգային երաժշտութեան ու երգարուեստի աշխարհահռչակ հիմնադիր Կոմիտաս Վարդապետի մահուան 80 րդ. տարելիցին նուիրուած համերգը որ ձօնուած էր հայոց ցեղասպանութեան 100 ամեակին, տեղի ունեցաւ 7 Յունիս 2015 Կիրակի երեկոյ, Թորոնթոյի Ս. Երրորդութիւն Հայաստանեայց Առաքելական եկեղեցւոյ կամարներուն ներքեւ, հովանաւորութեամբ Գանատահայոց Առաջնորդ՝ Գերշ. Տ. Աբգար Ս. Եպս. Յովակիմեանի, կազմակերպութեամբ՝ Հայկական Բարեգործական Ընդհանուր Միութեան եւ Կատարողական Արուեստներու Գանատահայ Ընկերակցութեան ( CAAPA ) ի կողմէ։

Համերգին ներկայ էին Առաջնորդ Աբգար Սրբազան, Ռումանիոյ Հայոց Թեմի Առաջնորդ՝ Գերշ. Տ. Տաթեւ Ս. Եպս. Յակոբեան, որ օրհնաբեր այցելութեամբ քաղաքս կը գտնուէր, առաւօտուն Սրբազան պատարագ մատուցանեց Ս. Երրորդութիւն եկեղեցւոյ մէջ, ինչպէս նաեւ Գերյ. Հայր Եղիա Ծ. Վրդ. Քիրէջեան, Արժ. Տ. Զարեհ Ա. Քհնյ. Զարգարեան եւ եկեղեցին լեցնող երաժշտասէրներու ընտրանի հասարակութիւն մը։

Կազմակերպութիւններու անունով Ատենապետուհի՝ Լենա Ուզունեանի ողջոյնի խօսքերէն ետք, հանդէս եկաւ Տոքթ.Արաքսի Ալթունեան, որ Կոմիտասի կեանքի ու հանճարի մասին ընդարձակ տեղեկութիւններ փոխանցեց, պաստառի վրայ ցոյց տալով իր կեանքէն ու գործունէութիւններէն զանազան դրուագներ։

Այս ձեռնարկին իրենց մասնակցութիւնը բերին Լարային Քառեակը որ կը բաղկանար Գայիանէ Բարաղամեան ( ջութակ ), Սօնա Գալթակեան ( ջութակ ), Էլիզապեթ Մորրիս ( ջութակ ) եւ Գայիանէ Սահակեան ( թաւջութակ ) է, որոնք զգայուն նուագածութեամբ հնչեցուցին Կոմիտասի ստեղծագործութիւններէն կտորներ, « Շողեր ջան » վերամշակում Ասլամազեանի, « Չինար ես» ,

« Քելէ-քելէ », « Հոյ Նազան », « Երկինքն ամպել է » եւ « Ալ այլուղս » կտորները որոնք արժանացան ջերմ գնահատանքի։

Այնուհետեւ բեմ բարձրացաւ սոփրանօ Լին Անոյշ Իշնար, – որուն ներկայութիւնը վերջերս յաճախ կը վայելենք զանազան բեմերու վրայ-, դաշնակի ընկերակցութեամբ Թինա Կարապետեանի որ տիրաբար կ՚ընկերանար իրեն։ Ան յաջորդաբար ներկաներուն հրամցուց Կոմիտասի սիրուած ժողովրդական երգերէն « Անտունի », « Ախ Մարալ ջան- Էրւում եմ », « Ո՜հ  ինչ քաղցր բան » եւ « Ձայն տուր ով ծովակ » կտորները։  Լին Անոյշ Իշնար իր բացառիկ ձայնով ու իր անսայթաք մեկնաբանութիւններով ինչպէս միշտ այս անգամ եւս հմայեց ներկաները եւ ողջունուեցաւ ջերմ ծափերով։

Միջնարարէն ետք Տոքթ. Ալթունեան հակիրճ տեղեկութիւններ փոխանցեց երկրորդ մասին մէջ ներկայացուելիք կտորներու մասին։ Ապա ջութակահար Գայիանէ Բարաղամեան մեկնաբանեց

Ս. Գրիգոր Նարեկացիի « Հաւուն-հաւուն » կտորը։ Լարային Քառեակի կողմէ ունկնդրուեցաւ հայ երաժշտութեան հայր, վերստեղծիչ Կոմիտասի Ս. Պատարագէն հոգեւոր եւ կրօնաշունջ երկու շարականներ « Սուրբ Սուրբ » եւ « Օրհնեալ է Աստուած »։ Յաջորդաբար Կոմիտասի « Կռունկ » ը մշակում Ասլամազեանի, « Տըլէ Եաման »ը որ վասպուրական ապրող գիւղացի հայ մարդու մը տագնապը կը պատմէ եւ « Ծիրանի ծառ » կտորները որոնք զուգանուագով մեկնաբանուեցան քառեակի արուեստագէտներուն կողմէ արժանացան ներկաներու բարձր գնահատանգին։

Լին անոյշ Իշնար այս անգամ կը ներկայանար հայ երգարուեստի սիրուած ժողովրդական երգերով, Բարսեղ Կանաչեանի « օրօր », « Ալվարդի երազը » եւ Համբարձում Պէրպէրեանի « Անոր » կտորները, զանոնք խիստ յաջող կերպով մեկնաբանեց հնչեցնելով անմահ երաժիշտներու յօրինումները ստանալով երկարատեւ ծափահարութիւններ, իրեն դաշնակով կ՛ընկերակցէր Թինա Կարապետեան։

Լարային քարեակը կրկին հանդէս եկաւ անմահ Կոմիտասի ստեղծագործական մշակումներէն սիրուած կտորներ ներկայացնելով։ Քառեակի անդամները նախ մեկնաբանեցին

« Հաբրբան », յաջորդաբար « Կաքաւիկ », « Գարուն ա » , « Վաղարշապատի պար »ը եւ որպէս պիսի կտոր « Հայրապետական մաղթերք »։

Համերգի աւարտին բոլոր արուեստագէտները արժանացան երկարատեւ ծափահարութիւններու եւ ստացան գեղեցիկ ծաղկեփունջեր։ Աբգար Սրբազանի հուսկ բանքով

ու աղօթքով իր աւարտին հասաւ յիշատակելի այս երեկոն։

S_DSC04837

S DSC04842 S DSC04847-001 S DSC04848 S Serp Hovakimian & performers

Events